(Ռատիօ Վատիկան) Անցեալ 30 դեկտեմբերին Սուրիոյ մէջ հաստատուած զինադադարը կը մնայ դիւրաբեկ սակայն յոյսով կը դիտուին Խազախիստանի մէջ կայանալիք խաղաղութեան բանակցութիւնները։ Այս առընչութեամբ Սուրիոյ մօտ առաքելական նուիրակ` կարդինալ Մարիօ Զենարի, Ռատիովատիկանի հետ ունեցած զրոյցի մը ընթացքին, հաստատած է թէ զինադադարը յոյսի նշոյլ մըն է բնակչութեան համար, շեշտելով թէ ''անհրաժեշտ է սակայն յոյսը պահպանել''։
Ակնարկելով միջազգային հասարակութեան ճիգերուն ու ՄԱԿ-իԱպահովութեան Խորհուրդի վերջերս որդեգրած բանաձեւերուն, Կարդինալ Զենարի յոյս յայտնած է որ այդ մէկը օժանդակէ փոփոխութեան մը, ու 2017 տարին ըլլայ իսկապէս շրջադարձային, թէեւ` դիտել տուած է Պապական Նուիրակը, շատ բան կայ ընելիք ու առաջին հերթին հարկաւոր է կասեցնել բռնութիւնը։
''Ժամանակն է դարմանելու վէրքերը, ըլլայ ֆիզիկական, ըլլայ յատկապէս հոգեկան'' հաստատած է Ծիրանաւորը մաղթանք յայտնելով որ յոյսի սերմերը ծլին ու աճին ու շուտով պարգեւեն հաշտութեան ու խաղաղութեան պտուղներ։
All the contents on this site are copyrighted ©. |